માન્યું કે,
ઘેર બેઠા કામ કરીને
આવે છે કંટાળો!
આમ તો બેઠું છે ચોમાસું;
તો’ય વરતાય ઉનાળો,
આદુ-ફુદીનાની ચા છોડી;
ઉઠતાં વેંત પીવો પડે ઉકાળો,
માન્યું કે…
ઘેર બેઠા કામ કરીને
આવે છે કંટાળો.
વાસીદું વાળે ઘરવાળી
ને; ઠામડાં ઘસે ઘરવાળો,
ઘેર ઘેર ગૃહસ્થીમાં;
થઈ ગયો મસમોટો ગોટાળો,
માન્યું કે,
ઘેર બેઠા કામ કરીને
આવે છે કંટાળો
માસ્ક ગ્લૉઝ પહેરીને;
કોરોના ને શક્ય એટલું ખાળો,
અકળામણ થાય તો;
દ્યો સરકારને બેચાર ગાળો;
માન્યું કે,
ઘેર બેઠા કામ કરીને
આવે છે કંટાળો
ભિન્ન ભિન્ન માનસિકતા;
શા’ને એમાં જીવ બાળો?
મળશે લાખો સલાહકારો;
વિચારીને કરવો સરવાળો,
માન્યું કે,
ઘેર બેઠા કામ કરીને
આવે છે કંટાળો
દુનિયા આખી છે ત્રસ્ત;
એટલે જ મચ્યો હોબાળો,
દોસ્ત; આપણી માટે તો
સૌથી સલામત આપણો માળો,
માન્યું કે,
ઘેર બેઠા કામ કરીને
આવે છે કંટાળો!
_આરતી પરીખ ૨૧.૭.૨૦૨૦
સંવેદનાનો સળવળાટ 