“ઓ છોરા, શે’ રહેશો કોરા ?!”

નેણ મારા મારાથી’ય બોલકા છે ઓ છોરા,
વેણ તો ખાળશો પણ દિલથી શે’ રહેશો કોરા ?! …

કવિની કોમળ કવિતા છું હું,
સ્નેહની શીતલ સરિતા છું હું,
મનથી મુગ્ધ મુદિતા છું હું,
છાની શે’ રાખીશ તારા દિલની વાત ઓ છોરા..

નેણ મારા મારાથી’ય બોલકા છે ઓ છોરા,
વેણ તો ખાળશો પણ દિલથી શે’ રહેશો કોરા ?! …

દર્પણ સામે તારા આ દિદાર તો જો,
વિરહથી ઉની ઉની અશ્રુધાર તો જો,
જરામાં છેડાયા ઉર-વીણાના તાર તો જો,
બંધ શે’ રાખીશ તારા દિલના દ્વાર ઓ છોરા..

નેણ મારા મારાથી’ય બોલકા છે ઓ છોરા,
વેણ તો ખાળશો પણ દિલથી શે’ રહેશો કોરા ?! …

સામી મળું તો ઠાલું શરમાય છે,

સપને મળું તો મીઠું હરખાય છે,

આંખોથી કેમ આવું કતરાય છે ?!

છેટું શે’ રાખીશ તારા દિલને મુજથી ઓ છોરા…

 

નેણ મારા મારાથી’ય બોલકા છે ઓ છોરા,
વેણ તો ખાળશો પણ દિલથી શે’ રહેશો કોરા ?! …

………………………………………………………………………._આરતી(૨૯.૯.૨૦૧૨)